的士佬成暢銷書王 作者:泊時鐘酒店攞靈感

作者:SHIRLEY 时间:2017-08-26 10:03:02 標籤: 分類:

「You talkin' to me?」(你同我講嘢?)

羅拔迪尼路在電影《的士司機》的經典台詞,40年後,仍然適用。

「試過有阿媽喺後座教仔:『嗱,今次考試又咁低分喇,嚇,你係咪想楂的士吖?』佢哋真係當你透明。」30歲出頭的白告(筆名),樹仁大學中文係畢業,做過老師,後來轉行摣的士,「以前未至於話備受尊敬,但至少大家以禮相待。而家?好多人一上車,講完去邊,就當你隱形。」

他當了老師幾年,午夜夢迴,忽然想停一停,搞清楚人生路向,「自己鍾意摣車,乜牌都有,的士牌一早好似儲印花咁儲咗出嚟。所以突然間話要搵份兼職,又要維持到生活,就係楂的士。」一念天堂一念地獄,由摣筆到摣軚,搣甩書卷味,見盡人間百態。

「楂的士一來搵錢,二來想體會唔同嘅人。譬如喺殯儀館門口停嚇,喺啲酒樓門口停嚇,又去醫院停嚇。」對他來說,九龍塘最特別,「我好鍾意停喺時鐘酒店門口,因為上車嘅人必然有故事。同埋開完房,梗係上的士啦,唔通仲帶住個女仔去逼地鐵咩?唔係咁cheap嚇嘩?」

於是,他在Facebook開了專頁,將開工奇遇一一記低,「始終以前教過書,我傾向啲故事係文以載道,有訊息。」的士乘客,千奇百怪。每一趟車程,猶如繁華裡的段段剪影。他由情慾寫到愛戀,又由愛戀談及生死。

上月書展,他出了第一本書《我的你的紅的》,成為首個摣的士摣到出書的人。書展未完,書已賣斷,作品急推第二版,登上連鎖書店暢銷榜。

「作為一個中文係畢業嘅人,你話細細個夢想出書,其實就好假嘅。今時今日出書唔難,但始終幾開心。」

的士之路,可有盡期?他未有答案,「如果我要多啲錢嘅,咁咪返去教書囉。就算我再入返去教室,都可以帶畀學生更多嘅嘢...點講呢,楂的士嘅過程中,個人會多咗同理心,更加容易理解唔同人。」

見過都市眾生,白告說,尚有一心願未了,遠在天邊,「成日話有流星雨,啲人就去東壩嗰度行餐死。楂的士就唔同囉,禁區都入得喎!我想載女朋友直上東壩,睇流星雨。成日想咁做,但未遇到好天氣。」

如想看白告的難忘車廂經歷,請觀看影片。
---------------
《港呢啲》:大事小事騎呢事,東網電視嚴謹選題,輕鬆製作!


本文來源:http://hk.on.cc/hk/bkn/cnt/news/20170826/bkn-20170826073056053-0826_00822_001.html

www.hk123hk.com

Copyright © 2016